Nordfjordeid er definitivt helsehovudstaden i Nordfjord. Med Nordfjord sjukehus som juvelen i krona, tilbyr bygda totalt sett på eit breitt spekter av helserelaterte tenester.

Nordfjord sjukehus er sjølvsagt den største og viktigaste helseinstitusjonen i heile nordfjordregionen, og det er eit stort engasjement frå alle dei berørte kommunane i Nordfjord for å oppretthalde eit fullverdig og godt tilbod på mellom andre fødeavdelinga og innan akutt kirurgi. Nordfjord sjukehus ligg svært nær hjarta til nordfjordingane og tilbyr ei heilt unik tryggleikskjensle. Det er kanskje ikkje under like trivelege omstende ein vert ”invitert” inn på sjukehuset, men det er definitivt alltid kjekt å ha eit lokalt sjukehus å verte invitert til!

Nordfjordeid byr i tillegg på ei rekkje andre helserelaterte tenester, der somme av dei har direkte tilknyting til sjukehuset. Du finn mellom andre private hjartespesialistar, kiropraktorar, tannlegar og aktørar som tilbyr alternative behandlingsmetodar med mellom anna magnetar og aquamassasje. Det ligg mykje helse i velvære, og det er fullt mogleg å kombinere helsebringande timar med total avslapping på eit spa- og velværesenter. Ein må heller ikkje gløyme helsetenestene innan Eid kommune som omfattar spekteret frå aldersheim, sjukeheim og heimehelsetenesta til helsesøstertenesta og fysio- og ergoterapitenesta.

Nordfjordeid har òg eit godt utbygd tilbod innan psykiatri og rusomsorg, mellom anna med ei avdeling for barne- og ungdomspsykiatri. Det totale tilbodet gjer at ein kan få hjelp til det meste på Nordfjordeid, til stor nytte for dei som får hjelp og for dei pårørande. Sånn sett vert ofte eit opphald på Nordfjordeid ei livsendrande oppleving for mange – både på godt og vondt!